မြန်မာနိုင်ငံကူးလက်မှတ်ထုတ်ပေးရေးရုံး

လက်ရှိအချိန်အထိ ရက်ချိန်းရယူနိုင်သောရက်

လျှောက်ထားသည့် ID အလိုက်ရုံးသို့လာရောက်ရမည့်စာရင်း

Appointment Date	Application Id No.

Online Appointment စနစ်ဖြင့် ရက်ချိန်းရယူခြင်းဆိုင်ရာ ကြေငြာချက်

၁။	မြန်မာနိုင်ငံသားများ ပြည်ပနိုင်ငံများသို့ သွားရောက်နိုင်ရေးအတွက် နိုင်ငံကူးလက်မှတ်များလျှောက်ထားမှု အဆင်ပြေချောမွေ့စေရန် မြန်မာနိုင်ငံကူးလက်မှတ်ထုတ်ပေးရေးအဖွဲ့မှ ဦးဆောင်၍ စီစဉ်ဆောင်ရွက်ပေးလျက်ရှိပါသည်။
၂။	ကိုဗစ်-၁၉ရောဂါ ဖြစ်ပွားပြီးနောက်ပိုင်းတွင် ပြည်ပနိုင်ငံများသို့ သွားရောက်အလုပ်လုပ်လိုသူများ များပြားလာပြီး နိုင်ငံကူးလက်မှတ်လျှောက်ထားသူ များပြားလာသဖြင့် မြန်မာနိုင်ငံကူး လက်မှတ်ထုတ်ပေးရေးရုံးတွင် လူထူထပ်စွာ တိုးကြိတ်လျှောက်ထားမှုကြောင့် လျှောက်ထားသူများ အချိန်ကြာမြင့်စွာတန်းစီရခြင်း၊ ကိုဗစ်ရောဂါကူးစက်နိုင်ခြင်း စသည့် အဆင်မပြေမှုများ ဖြစ်ပေါ်ခဲ့ပါသည်။
၃။	သို့ဖြစ်၍ ၂၁-၃-၂၀၂၂ ရက်နေ့မှစ၍ www.passport.gov.mm website တွင် Online Booking စနစ်ဖြင့် ရုံးဖွင့်ရက် ၀၉:၀၀ ချိန်တွင် QR Code ဖြင့် ရက်ချိန်းရယူစေပြီး သတ်မှတ်ထားသည့် နေ့ရက်/အချိန်တို့တွင် လာရောက်လျှောက်ထားရန် စီစဉ်ဆောင်ရွက်ခဲ့ရာ လုံခြုံရေး၊ ကျန်းမာရေးအတွက် စနစ်တကျရှိခဲ့ပါသည်။
၄။	သို့သော် QR Code ဖြင့်ရက်ချိန်းရယူရာတွင် အချို့ပြည်သူများသည် Online Booking မတင်တတ်ခြင်း၊ ၀၉:၀၀ အချိန် စနစ်စတင်ခွင့်ပြုသည်နှင့် တစ်ပြိုင်နက် အဆပေါင်းများစွာသော ရက်ချိန်းရယူသူများမှ တစ်နေ့စာခွင့်ပြုနိုင်သည့် သတ်မှတ်လူဦးရေအရေအတွက်ထက် များစွာကျော်လွန် ကြိုးစားရယူကြရာတွင် လိုင်းကျပ်ခြင်း၊ မကျွမ်းကျင်ခြင်း၊ သည်းခံနိုင်စွမ်းမရှိခြင်းတို့ကြောင့် ပွဲစားများကိုအပ်နှံခြင်း၊ Online ပေါ်ရှိ ပွဲစားကြေညာ များကို အားကိုးခြင်းတို့ကြောင့် လိမ်လည်သူများ၊ QR Code အတုပြုလုပ်သူများ၊ အခမဲ့ QR ရယူနိုင်သည့်အတွက် ကိုယ်ရေးအချက်အလက် အမှားများဖြင့် လူဦးရေများစွာ QR Code လျှောက်ထားပြီး ရုံးသို့လာရောက်ခြင်းမရှိသူများနှင့် ကြုံတွေ့ပြီး ပြည်သူများအနေဖြင့် မလိုလားအပ်သော ပြဿနာများနှင့် ရင်ဆိုင်ခဲ့ရပါသည်။
၅။	ယင်းပြဿနာများပြေလည်စေရန်အတွက် Online Booking စနစ်သစ်တွင် ပြည်သူတစ်ရပ်လုံး နေ့စဉ်/အချိန်မရွေး ကိုယ်တိုင်လျှောက်ထားနိုင်သည့်စနစ်၊ Online မှ ငွေပေးချေနိုင်သည့် စနစ်ကို ပြင်ဆင်ဆောင်ရွက်သွားရခြင်း ဖြစ်ပါသည်။
၆။	ယခုစနစ်သစ်အား ရှင်းလင်းလွယ်ကူစွာ လျှောက်ထားနိုင်ရန် စီစဉ်ထားရှိပြီး ကိုယ်ရေးအချက်အလက်များ ဖြည့်စွက်ရာတွင် ချက်ခြင်းဖြည့်သွင်းရန် အခက်အခဲရှိပါက ကိုယ်ရေးအချက်အလက်(၁)ကိုသာလျင် ချက်ခြင်းဖြည့်သွင်းရန်လိုအပ်ပြီး ကျန်အချက်များအား ကိုယ်ရေးအချက်အလက်ပုံစံကို Download ဆွဲယူ၍ လက်ရေး(သို့မဟုတ်)ကွန်ပျူတာစီပြီး ရက်ချိန်းပေးသည့်ရက်တွင် ကိုယ်တိုင်ယူဆောင်လာနိုင်ပါသည်။ (Download ဆွဲယူနိုင်ရန်အတွက် သီးခြားဖော်ပြထား ပါသည်။)
၇။	စနစ်ဟောင်းတွင် မြန်မာနိုင်ငံကူးလက်မှတ်ထုတ်ပေးရေးရုံး၌ ဘဏ်ငွေသွင်းချိန်များကို လျှော့ချနိုင်ရန်အတွက် ယခုစနစ်သစ်တွင် Online မှ တစ်ပါတည်းငွေသွင်းနိုင်ရန် စီစဉ်ထားရှိပါသည်။ ကျသင့်ငွေပေးသွင်းပြီးမှသာလျှင် ရက်ချိန်းရရှိနိုင်မည်ဖြစ်သည့်အတွက် ပွဲစားများ၊ မသက်ဆိုင်သူများမှ အရေအတွက်များပြားစွာ လျှောက်ထားမှုများကို လျော့နည်းပပျောက်စေမည် ဖြစ်ပါသည်။
၈။	ယခုစနစ်သစ်တွင် ကိုယ်တိုင်လွယ်ကူစွာ လျှောက်ထားနိုင်ရန် စီစဉ်ထားခြင်းဖြစ်၍ ပွဲစားများ၊ အကျိုးဆောင်ကုမ္ပဏီများ၊ အကျိုးဆောင်များ၊ အကျင့်ပျက်ဝန်ထမ်းများအား ငွေပေး၍ဆောင်ရွက်ခြင်းကို စိစစ်တွေ့ရှိပါက တည်ဆဲဥပဒေအရ ထိရောက်စွာ အရေးယူမည် ဖြစ်သည့်အပြင် Black list စာရင်းတွင် ထည့်သွင်းခံရမည်ဖြစ်၍ နောင်တွင် နိုင်ငံကူးလက်မှတ်လျှောက်ထားနိုင်မည် မဟုတ်တော့ပါ။
၉။	ငွေပေးသွင်းမှုစနစ်အနေဖြင့် ယခုအချိန်တွင် KBZPay နှင့် MPU ဘဏ်ကတ်များဖြင့်သာ ပေးသွင်းရန် စီစဉ်ထားသော်လည်း မကြာမီအချိန်တွင်းမှာပင် အခြား Payment စနစ်များဖြင့် ပေးသွင်းနိုင်ရန် ဆက်လက်ဆောင်ရွက်သွားမည် ဖြစ်ပါသည်။ ရက်ချိန်းရယူချိန်တွင် မြန်မာနိုင်ငံကူးလက်မှတ် စာအုပ်ဖိုးငွေများကိုပါ တစ်ပါတည်းပေးသွင်းရခြင်းဖြစ်သည့်အတွက် လျှောက်ထားသူတစ်ဦးလျှင် ငွေေပးချေမှု တစ်ကြိမ်သာပြုလုပ်ရမည်ဖြစ်ပြီး တစ်ကြိမ်ထက်ပို၍ ငွေပေးသွင်းမှုဖြစ်စဉ်များအတွက် မြန်မာနိုင်ငံကူးလက်မှတ်ထုတ်ပေးရေးအဖွဲ့မှ ငွေပြန်အမ်းမည်မဟုတ်ကြောင်း အသိပေးကြေညာအပ်ပါသည်။
၁၀။	ယခု Online Booking စနစ်တွင် ငွေပေးသွင်းပြီးပါက မြန်မာနိုင်ငံကူးလက်မှတ်ထုတ်ပေးရေးရုံးတွင် မည်သည့်ငွေကြေးမှ ပေးဆောင်ရန် မလိုအပ်တော့ဘဲ သက်ဆိုင်ရာဝန်ထမ်းများမှ ငွေကြေးတောင်းခံလာပါက ရုံးတွင်ဖော်ပြထားသည့် တိုင်ကြားရန်ဖုန်းနံပါတ်များဖြင့် အမြန်ဆုံး တိုင်ကြားနိုင်မည်ဖြစ်ပြီး ထိရောက်စွာ အရေးယူဆောင်ရွက်သွားမည် ဖြစ်ပါသည်။
၁၁။	ပြည်ပသို့အချိန်မီသွားရောက်ရမည့်သူများအတွက် သက်ဆိုင်ရာဝန်ကြီးဌာနများ၏ ထောက်ခံချက်များဖြင့် နိုင်ငံကူးလက်မှတ် အမြန်ရရှိရေး Green Channel ဖြင့် လျှောက်ထားနိုင်ရန် စီစဉ်ထားရှိပါသည်။

Green Channel ဖြင့် လျှောက်ထားခြင်းအတွက် လမ်းညွှန်ချက်

၁။	Green Channel သည် အရေးကြီး/ အရေးပေါ်ကိစ္စရပ်များဖြင့် ပြည်ပသို့ အချိန်မီ သွားရောက်ရန် လိုအပ်သူများအတွက် နိုင်ငံကူးလက်မှတ် အမြန်ထုတ်ယူရရှိရန် စီစဉ်ထားခြင်း ဖြစ်ပါသည်။
၂။	Green Channel ဖြင့် လျှောက်ထားရာတွင် MoU အလုပ်သမားများ၊ ဘာသာရေးဆိုင်ရာအဖွဲ့အစည်းများ၊ ယဉ်ကျေးမှုဖလှယ်ပွဲများ၊ သင်္ဘောသားများ၊ ပြည်ပသို့ ခွင့်ဖြင့်သွားရောက်မည့် ကိစ္စရပ်များ၊ ပြည်ပသို့ ဆေးကုသွားမည့်သူများ၊ ဆေးကုဖော် လိုက်ပါမည့်သူများ၊ ခရီးသွားလုပ်ငန်း ဖွံ့ဖြိုးတိုးတက်ရေးအတွက် ခရီးသွားအေဂျင်စီများ၊ ပညာသင်များ၊ သက်ဆိုင်ရာဝန်ကြီးဌာနအလိုက် အစိုးရကိစ္စရပ်များဖြင့် သွားရောက်မည့် သူများအနေဖြင့် အချက်အလက် ပြည့်စုံမှန်ကန်စွာဖြင့် တင်ပြလာမှုအပေါ် သက်ဆိုင်ရာ ဝန်ကြီးဌာနများ၏ ညွှန်ကြားရေးမှူးချုပ် အဆင့်နှင့်အထက် တာဝန်ရှိသူများမှ လက်မှတ်ရေးထိုး ထောက်ခံပြီး ၎င်းဝန်ကြီးဌာနများမှတဆင့် ဥက္ကဋ္ဌ၊ မြန်မာနိုင်ငံကူးလက်မှတ်ထုတ်ပေးရေး အဖွဲ့ရုံးသို့ စာဖြင့် ကြိုတင်လျှောက်ထားပြီးပါက Online Appointment ပြုလုပ်ခြင်းဖြင့် ရက်ချိန်းရယူရန် မလိုအပ်ဘဲ Green Channel အဖြစ် လက်ခံဆောင်ရွက်ပေးသွားမည် ဖြစ်ပါသည်။
၃။	ဥက္ကဋ္ဌရုံးသို့ ထောက်ခံတင်ပြပေးရမည့် ဝန်ကြီးဌာနများအနေဖြင့် မိမိသွားရောက်မည့် အကြောင်းအရာနှင့် ဆက်စပ်သည့် ဝန်ကြီးဌာနများဖြစ်ပြီး ဥပမာ- MoU အလုပ်သမားများအတွက် အလုပ်သမားဝန်ကြီးဌာန၊ ဘာသာရေးကိစ္စ/ သံဃာ/သီလရှင်များအတွက် သာသနာရေးနှင့်ယဉ်ကျေးမှု ဝန်ကြီးဌာန၊ သင်္ဘောသားများ/လေကြောင်းဝန်ထမ်းများအတွက် ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ဆေးကု/ကျန်းမာရေးကိစ္စများအတွက် ကျန်းမာရေးဝန်ကြီးဌာန၊ ခရီးသွားလုပ်ငန်းများအတွက် ဟိုတယ်နှင့်ခရီးသွားလာရေးဝန်ကြီးဌာန၊ အစိုးရကိစ္စ/ ပညာသင်ကိစ္စများအတွက် လုပ်ငန်း ဆက်စပ်သည့် သက်ဆိုင်ရာဝန်ကြီးဌာနများမှ ညွှန်ကြားရေးမှူးချုပ်နှင့်အထက်အဆင့်များ ထောက်ခံပြီး ၎င်းဝန်ကြီးဌာနများမှတဆင့် ဥက္ကဋ္ဌ/အတွင်းရေးမှူး၊ မြန်မာနိုင်ငံကူးလက်မှတ်ထုတ်ပေးရေးရုံး(နေပြည်တော်) သို့ ရုံးစာဖြင့် ပေးပို့တင်ပြသွားရန် ဖြစ်ပါသည်။
၄။	ဥက္ကဋ္ဌရုံးမှ ယင်းထောက်ခံချက်နှင့်အတူ စိစစ်ခွင့်ပြုချက်များကို မြန်မာနိုင်ငံကူးလက်မှတ်ထုတ်ပေးရေးရုံး(ရန်ကုန်)သို့ ကြိုတင်စာရင်းပေးသွင်းထားမည် ဖြစ်ပါသည်။ Online Appointment စနစ်မှ ရုံးသို့လာရောက်ရမည့်ရက်ချိန်းကို ထုတ်ပေးမည်မဟုတ်ဘဲ ဥက္ကဋ္ဌရုံးမှ မြန်မာနိုင်ငံကူးလက်မှတ် ထုတ်ပေးရေးအဖွဲ့ရုံး(ရန်ကုန်)သို့ အမြန်ဆုံးစိစစ်ပေးပို့သွားမည်ဖြစ်၍ သက်ဆိုင်ရာမြန်မာနိုင်ငံကူးလက်မှတ်ထုတ်ပေးရေးရုံးနှင့် ဆက်သွယ်ဆောင်ရွက် သွားရန် ဖြစ်ပါသည်။ ထိုသို့ဆောင်ရွက်ရာတွင် အခက်အခဲရှိပါက ဥက္ကဋ္ဌရုံး၊ ဖုံးနံပါတ် ၀၉၈၈ ၂၁၅ ၆၆၃၃၊ ၀၆၇-၃၄၁ ၂၈၃၀၊ ၀၆၇-၃၄၁ ၂၈၃၀ သို့ ဆက်သွယ်မေးမြန်းနိုင်ပါသည်။

Online Booking ပြုလုပ်ခြင်းလမ်းညွှန်

၁။	ပုံမှန်ရက်ချိန်းရယူသူများမှ Online Appointment ပြုလုပ်ခြင်းခလုတ် (သို့မဟုတ်) အရေးကြီး/ အရေးပေါ်ကိစ္စရပ်များအတွက် ဝန်ကြီးဌာနထောက်ခံစာဖြင့် လျှောက်ထားသူများမှ Green Channel ဖြင့် လျှောက်ထားခြင်း (ဝန်ကြီးဌာနများမှတဆင့် လျှောက်ထားသူများသာ) ခလုတ်ကို နှိပ်၍ စနစ်အတွင်း ဝင်ရောက်ပါ။
၂။	မိမိနှင့်အတူ နိုင်ငံကူးလက်မှတ် ပူးတွဲလျှောက်ထားလိုသည့် လူဦးရေကို ရွေးချယ်ပါ။ လျှောက်ထားသူအားလုံးအတွက် ငွေလက်ခံနှင့် ရက်ချိန်းအတည်ပြုချက် လက်ခံရယူမည့် Email အား ဖြည့်သွင်း၍ Continue ခလုတ်ကို နှိပ်ပါ။
၃။	ကိုယ်ရေးအချက်အလက်(၁)ရှိ အချက်အလက်များအားလုံးကို ဖြည့်သွင်းပါ။ ကိုယ်ရေး အချက်အလက်(၂)နှင့် မိသားစုဝင်နှင့် ညီအစ်ကိုမောင်နှများ၏ အချက်အလက်များကိုလည်း Online မှ တစ်ပါတည်းဖြည့်သွင်း လျှောက်ထားနိုင်သကဲ့သို့ အခက်အခဲရှိပါက ယင်း အချက်အလက်များကို နိုင်ငံကူးလက်မှတ်လျှောက်လွှာဖောင်တွင် လက်ရေးဖြင့် ရေးဖြည့်၍ နိုင်ငံကူးလက်မှတ်ထုတ်ပေးရေးရုံးသို့ တင်ပြလျှောက်ထားနိုင်ပါသည်။
၄။	တစ်ဦးထက်ပိုသော လျှောက်ထားသူများမှ လျှောက်ထားသူတစ်ဦးအတွက် အချက်အလက်များ ဖြည့်သွင်းပြီးလျှင် အချက်အလက်ဖြည့်စွက်ပြီးသည့် လျှောက်ထားသူအား စာရင်းသွင်းရန် Add to List ခလုတ်ကို နှိပ်ပါ။ ထို့နောက် အခြားလျှောက်ထားသူ၏ အချက်အလက်များကို ဆက်လက်ဖြည့်သွင်းပါ။
၅။	လျှောက်ထားသူအားလုံးအတွက် အချက်အလက်များ ဖြည့်သွင်းပြီးမှသာ မျက်နှာပြင် ညာဘက်အပေါ်ထောင့်ရှိ Review and Submit ခလုတ်ကိုနှိပ်ပါ။ တစ်ဦးချင်းစီစစ်ဆေးပြီး မှန်ကန်လျှင် 'အချက်အလက်များစစ်ဆေးပြီး အားလုံးမှန်ကန်ပါသည်' စာသားရှေ့တွင် အမှန် ခြစ်ပါ။ ကွဲလွဲချက်ရှိနေပါက Edit ခလုတ်ကို နှိပ်၍ ကွဲလွဲသည့်အချက်အလက်ကို ပြင်ဆင်ပါ။ အားလုံးမှန်ကန်ပါက Submit Form ကို နှိပ်ပါ။
၆။	ကိုယ်ရေးအချက်အလက်များ ဖြည့်စွက်ပြီးပါက ငွေပေးသွင်းရပါမည်။ ငွေပေးသွင်းခြင်းကို KBZ-Pay ဖြင့်သော်လည်းကောင်း၊ မြန်မာနိုင်ငံဘဏ်များအားလုံး၏ MPU ဘဏ်ကတ်ဖြင့် လည်းကောင်း ပေးချေနိုင်ပါသည်။ သို့ရာတွင် MPU ဘဏ်ကတ်သည် E-commerce အသုံးပြုရန် သက်ဆိုင်ရာဘဏ်တွင် လျှောက်ထားပြီးသည့် ဘဏ်ကတ်ဖြစ်ရပါမည်။ ပေးချေရာတွင် လျှောက်ထားသူတစ်ဦးချင်းစီ၏ Invoice No. ကို ရွေးချယ်၍ ငွေပေးချေမည့်စနစ်ကို ရွေးချယ်ပေးချေနိုင်ပါသည်။ လျှောက်ထားသူအမျိုးအစားအလိုက် အသစ်လျှောက်နှင့် သက်တမ်းတိုးအတွက် ၃၅၀၀၀ ကျပ်၊ ပျောက်ဆုံး/ပျက်စီးအတွက် ၇၅၀၀၀ ကျပ်တို့ ပေးသွင်း ရပါမည်။ သက်တမ်းတိုး လျှောက်ထားသူများအနေဖြင့် မိမိလက်ဝယ်ရှိ နိုင်ငံကူးလက်မှတ် စာအုပ်သည် ရေစိုပျက်စီးခြင်း၊ စုတ်ပြဲခြင်းများ ဖြစ်ပေါ်နေပါက ဌာနမှ ပျက်စီးစာအုပ်အဖြစ် သတ်မှတ်မည်ဖြစ်သည့်အတွက် ၇၅၀၀၀ ကျပ်နှုန်းဖြင့် ပေးသွင်းထားရန်လိုအပ်ပြီး ၃၅၀၀၀ ကျပ် နှုန်းဖြင့်သာ ပေးသွင်းထားပါက ရုံးတွင်းရောက်ချိန် ကျန်ဒဏ်ကြေးငွေ ၄၀၀၀၀ ကျပ်ကို ထပ်မံပေးသွင်းရန် အခက်အခဲ ကြုံတွေ့နိုင်ပါသည်။
၇။	ငွေပေးချေပြီးသည်နှင့် ပုံမှန်ရက်ချိန်းရယူသူများကို နိုင်ငံကူးလက်မှတ်ထုတ်ပေးရေးရုံးသို့ လာရောက်ရမည့်ရက်အား စနစ်မှအလိုအလျောက် သတ်မှတ်ပေးပါမည်။ Green Channel ဖြင့် လျှောက်ထားသူများအတွက်ကိုမူ စနစ်မှ နိုင်ငံကူးလက်မှတ်ထုတ်ပေးရေးရုံးသို့ လာရောက်ရမည့်ရက်အား ထုတ်ပေးမည်မဟုတ်ဘဲ သက်ဆိုင်ရာမြန်မာနိုင်ငံကူးလက်မှတ် ထုတ်ပေးရေးရုံးမှ ရုံးသို့လာရောက်ရမည့်ရက်ကို သတ်မှတ်ပေးမည်ဖြစ်သည်။

မြန်မာနိုင်ငံကူးလက်မှတ်လျှောက်ထားရာတွင် ကုန်ကျမည့်ငွေစာရင်း

အသစ်လျှောက်ထားရန်

၃၅,၀၀၀ ကျပ်

အသစ်လျှောက်
သက်တမ်းတိုး

ပျောက်ဆုံး/ပျက်စီးလျှောက်ထားရန်

၇၅,၀၀၀ကျပ်

ပြည်တွင်းပျောက်
သက်တမ်းကျန်
ရေစို
စွန်းထင်း/စုတ်ပြဲ/ရေးခြစ်မှုများ

ပြည်ပပျောက်ဆုံးကုန်ကျငွေ

အမေရိကန်ဒေါ်လာ ၇၅ဒေါ်လာနှင့် ညီမျှသောမြန်မာကျပ်ငွေ

ပြည်ပတွင်စာအုပ်ပျောက်ဆုံးခြင်း

မြန်မာနိုင်ငံကူးလက်မှတ်အမျိုးအစားများ

အလည်အပတ် (PV) (Passport for Visit)
အလည်သွားရောက်ရန်အတွက်ဖြစ်ပါသည်။
သင်္ဘောသား (PS) (Passport for Seaman)
သင်္ဘောပေါ်တွင် အလုပ်လုပ်ရန်အတွက်ဖြစ်ပါသည်။
စီးပွားရေး (PB) (Passport for Business)
ကုမ္ပဏီလုပ်ငန်းများနှင့်ပတ်သက်၍လေ့လာခြင်း၊ အစည်းအဝေးများ တက်ရောက်ခြင်းအတွက်ဖြစ်ပါသည်။
ပညာရေး (PE) (Passport for Education)
သင်တန်းများ၊ ကျောင်းများတက်ရောက်ရန်အတွက် ဖြစ်ပါသည်။
အလုပ် (PJ) (Passport for Job)
ကုန်းပေါ်၌အလုပ်လုပ်ရန်ဖြစ်ပြီး သက်ဆိုင်ရာနိုင်ငံများ၏ အလုပ်သမားအခွင့်အရေးများ ရရှိရန်အတွက်ဖြစ်ပါသည်။
ဘာသာရေး (PR) (Passport for Religious)
ပြည်ပနိုင်ငံများတွင် သာသနာပြုလုပ်ငန်းများ ဆောင်ရွက်ရန်အတွက်ဖြစ်ပါသည်။
မှီခို (PT) (Passport for Dependent)
ပြည်ပတွင် အလုပ်လုပ်ကိုင်နေသူအား မှီခိုနေထိုင်ရန် လိုက်ပါမည့်မိသားစုဝင်များအတွက် ဖြစ်ပါသည်။

လျှောက်ထားသူတွင်ပါရှိရမည့်အထောက်အထားများ

လျှောက်ထားသူအားလုံးတွင် ပါရှိရမည့် အထောက်အထား

- နိုင်ငံသားစိစစ်ရေးကတ်ပြား(မူရင်း)နှင့် မိတ္တူ(၂)စုံ
- အိမ်ထောင်စုစာရင်း(မူရင်း)နှင့် မိတ္တူ(၂)စုံ
- အသက်(၁၀)နှစ်အောက်ဖြစ်လျှင် မွေးစာရင်း(မူရင်း)နှင့် မိတ္တူ(၂)စုံ

သင်္ဘောသားများ

- ပြည်တွင်းရေကြောင်းမှ အခြေခံပင်လယ်ပြင် အသက်အန္တရာယ် လုံခြုံမှုသင်တန်းဆင်း လက်မှတ် မူရင်းနှင့် မိတ္တူ(၂)စုံ
- သက်တမ်းတိုးဖြစ်ပါက မြန်မာနိုင်ငံကူးလက်မှတ်စာအုပ်ဟောင်း၊ သင်္ဘောသားလုပ်သက် မှတ်တမ်း(CDC)စာအုပ် မူရင်းနှင့် မိတ္တူ(၂)စုံ
စီးပွားရေးမနလလျှောက်ထားလိုသူများ

- ကုမ္ပဏီမှတ်ပုံတင်မူရင်းနှင့် မိတ္တူ(၁)စုံ
- ပုံစံ(၆/၂၆)မူရင်းနှင့် မိတ္တူ(၁)စုံ
ကျောင်း/သင်တန်းများတက်ရောက်လိုသူများ

- သက်ဆိုင်ရာကျောင်း၏ ခေါ်စာမူရင်းနှင့် မိတ္တူ(၁)စုံ
ပြည်ပအလုပ်အကိုင်အတွက်လျှောက်ထားလိုသူများ

- အလုပ်သမားများ၏ ပြည်ပ အလုပ်သမား မှတ်ပုံတင်ကတ်ပြား အလလခ(ပုံစံ-၂)
မှီခိုလျှောက်ထားလိုသူများ

- နိုင်ငံခြားသား မှီခိုဖြစ်ပါက အပြန်လေယာဉ်စရိတ် ပေးသွင်းပြီးကြောင်း ထောက်ခံစာ၊
- လက်ထပ်စာချုပ်ကဲ့သို့သော အထောက်အထားများ
ရဟန်းသံဃာများ၊ သီလရှင်များ

- သာသနာဝင်ကတ်ပြား မူရင်းနှင့် မိတ္တူ(၂)စုံ
- မြို့နယ်သံဃနာယကအဖွဲ့၏ ထောက်ခံချက် မူရင်းနှင့် မိတ္တူ(၁)စုံ
နိုင်ငံဝန်ထမ်းများ

- သက်ဆိုင်ရာဝန်ကြီးဌာန၏ ပြည်ပတွင် ခွင့်ခံစားခွင့် မူရင်းနှင့် မိတ္တူ(၁)စုံ
ပြစ်ဒဏ်ကျခံဖူးသူများ

- ထောင်ထွက်လက်မှတ် မူရင်းနှင့် မိတ္တူ(၁)စုံ

လျှောက်ထားသူမှစာအုပ်ထုတ်ယူရန် Slip ရရှိပါကစိစစ်ရမည့်အချက်များ

အမည် အင်္ဂလိပ်စာလုံးပေါင်း မှန်ကန်မှု ရှိ/မရှိ စိစစ်ရန်
မွေးသက္ကရာဇ် မှန်ကန်မှု ရှိ/မရှိ စိစစ်ရန်
ကျား/မ ရေးသွင်းချက် မှန်ကန်မှု ရှိ/မရှိ စိစစ်ရန်
မွေးရပ်ဇာတိ မှန်ကန်မှုရှိ/မရှိ တို့အား

Slip ရရှိချိန်တွင် လျှောက်ထားသူကိုယ်တိုင် စိစစ်ရမည်ဖြစ်ပါသည်။

မြန်မာနိုင်ငံကူးလက်မှတ်ထုတ်ပေးရေးရုံး

ဆရာစံလမ်းနှင့် စက်မှု(၁)လမ်းထောင့်၊
ဗဟန်းမြို့နယ်၊ ရန်ကုန်တိုင်း

onlinepassportmm@gmail.com

01 546624

မြန်မာနိုင်ငံကူးလက်မှတ်လျှောက်ထားရန်

လက်ရှိအချိန်အထိ ရက်ချိန်းရယူနိုင်သောရက်

လျှောက်ထားသည့် ID အလိုက်ရုံးသို့လာရောက်ရမည့်စာရင်း

Online Appointment စနစ်ဖြင့် ရက်ချိန်းရယူခြင်းဆိုင်ရာ ကြေငြာချက်

Green Channel ဖြင့် လျှောက်ထားခြင်းအတွက် လမ်းညွှန်ချက်

Online Booking ပြုလုပ်ခြင်းလမ်းညွှန်

မြန်မာနိုင်ငံကူးလက်မှတ်လျှောက်ထားရာတွင် ကုန်ကျမည့်ငွေစာရင်း

အသစ်လျှောက်ထားရန်

၃၅,၀၀၀ ကျပ်

ပျောက်ဆုံး/ပျက်စီးလျှောက်ထားရန်

၇၅,၀၀၀ကျပ်

ပြည်ပပျောက်ဆုံးကုန်ကျငွေ

အမေရိကန်ဒေါ်လာ ၇၅ဒေါ်လာနှင့် ညီမျှသောမြန်မာကျပ်ငွေ

မြန်မာနိုင်ငံကူးလက်မှတ်အမျိုးအစားများ

လျှောက်ထားသူတွင်ပါရှိရမည့်အထောက်အထားများ

လျှောက်ထားသူမှစာအုပ်ထုတ်ယူရန် Slip ရရှိပါကစိစစ်ရမည့်အချက်များ

မြန်မာနိုင်ငံကူးလက်မှတ်ထုတ်ပေးရေးရုံး